Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
4. Fii no annabi Iisaa tororii Alla fii yubbhondiral Mofte dhen (Yuuhanna 17:20-26)
YUUHANNA 17:24
24 Baaba an, midho yidhi yo bhe okkudhaa mi bhen wonu ka mi woni dhon, fii no bhe yi’ira mangu an ngu yedhudhaa mi ngun, bhay a yidhiino lan ado aduna on woodeede.
Ka tornde makko fii fuddhagol almamaaku makko ngun, annabi Iisaa no noddirde Alla «Baaba» laabiiji jeegoo, e «Alla goongaajo on» nde wootere. Rewrude e nden innde wajjere, o holli hoolaare makko nden e faale makko tiidhudho on fii Alla. Sabu hari himo humondiri e Baabaajo on humondiral gootal, kono o hayfintinike kanko tigi, o okkitirii hoore makko fii no o sottira en. O faalanooka few wonude aaden andaadho maa jogiidho keyeeji. O yewtii laabiiji heewudhi wondema: «a yedhii lan bhen». Almasiihu on no yhettiri aduna on e taalibaabhe makko bhen e kuudhe makko dhen e bawgal makko ngal wa dokkal iwungal ka Alla, wa si tawii hinaa kanko woni ko jeyi dhun fow. Hari o jogitaaki dhun, e hoore dhun himo watti mangu ngun e teddungal ngal fow e juudhe Ben makko. Nden yankinaare mari bhe e nder humondiral tabitugal fii no Bhiddho on huuwira miijooji e faaleeji Ben makko dhin no timmiri.
Sabu ko o dhoftii kon dhoftaare timmunde, himo waawi wi’ude e nder tornde makko nden «midho yidhi». E ko hondhun non Bhiddho Allaahu on faalaa? Ko yo taalibaabhe makko bhen fow, ka bhe woni woo e saa’i woo, wonu ka o woni dhon. Wano non Puulusa wi’i wonde o fempidaama e Almasiihu on, o surridaama e makko fii no o tawdiree e ummutal makko ngal e no o joddhiniroyee e makko ka kammuuli fii no o fennyinira ngalu sulfu makko feyyhitungu ngun (Roomu 6:1-11; Efeesi 2:4-7).
Humondiral men e Almasiihu on no yawti ko sendodeten tampereeji makko dhin e giggol makko ngol kon, mangu makko ngun no tawaa e mun. Himo faalaa yo en yi’u mangu makko ngun e yo en tabitu e giggol makko ngol haa poomaa. Sahaabaabhe bhen no andunoo tama’u men on. En weltoyto weltaare nde sifotaako nyande yiidoyten e makko. Hidhen yaltini kadi batte mangu makko ngun, ko e mbaadi makko ndin wayladhen, bhayru ko e fee ko giggol Alla ngol juuraa kon ka bherdhe men mbaadi men ndin wontiri jalbudi (Roomu 5:5 e 8:29). O sendodii e men mangu makko ngun, sabu hari himo darjini hay ka o woni dhon neddho. Sahaabaabhe bhen faami wondema himo wondi e darja iwudho e giggol ngol landaaki goddhun e wonugol ngol hakkunde makko e Baabaajo on, fuddhiingol adii aduna on woodeede. Ngal gomdhinal e Tatoobhe Laabhubhe bhen e nder Gooto on woni bhundu men ndun e joddi men ndin.
YUUHANNA 17:25
25 Baaba an feewudho, aduna on andaali ma, kono min, mi andii ma, awa bhee dhoo kadi andii ko an nulimmi.
Ko Allaahu on feewi kon e ko o moyyhi kon hinaa ko waylotoo, hay si tawii aduna on faamaa dhun. Ka haqiiqa, ko o laabhudho niwre woo alaa e makko. On mo andii giggol makko wonugol ngol e Almasiihu on faamay wonde hinaa kanko wadhi si yimbhe bhen alaa e gomdhinde Bhiddho Alla on maa bhe alaa e hendaade kisiyee on.
Kono Almasiihu on no andunoo Ben makko gila poomaa sabu o yi’ii mo gite e gite. Himo andi jikku makko on e moyyhereeji makko dhin e indhe makko dhen. Bannheeji bhurdhi e luggunde dhin e allankaaku makko ngun wirnanaaki Mo.
Dendaangal bhen jabhubhe Bhiddho on, Alla yedhay bhe feere no bhe wontira bhibbhe makko. Annabi Iisaa fennyinanii bhe gundoo allankaaku Alla ngun. Bhen yimbhe heydhintinaabhe no faamii wonde Almasiihu on ko ka Alla iwi. Hinaa o annabaajo maa neeladho tun. Allankaaku Alla ngun fow no e neddhankaaku Almasiihu on ngun. Ruuhu on wallitoto en no faamiren allaankaaku Alla wongu ngun e neddhankaaku Almasiihu on ngun, ko kanko humindiri en e Bhiddho on e Baabaajo on, on nuludho mo. Wano non ko kanko woni humidiroowo on Alla e neddhanke.
YUUHANNA 17:26
26 Mi andinii bhe innde maa nden, awa kadi mi andinay bhe, fii no giggol ngol yidhudhaa mi ngol wonira e mabbhe, min kadi mi wona e mabbhe.
Ka nyoggugol haala, Almasiihu on andinii en fennyinannde innde Baabaajo on. Ka dhun bhuri dhon bhangude ko ka leggal altidiraangal, ka Baabaajo on sakkii dhon Bhiddho makko on no hebhiren feere noddireede bhibbhe. Fewndo ko Ruuhu-Seniidho on tippii e men, en ewnino: «Alla Abba!». Ko tornde Joomiraadho on woni meetelol torndeeji dhin fow sabu hinde mawnini Baabaajo on e Laamateeri makko ndin e muydhe makko dhen.
Medhen faami Baabaajo Iisaa-Almasiihu Joomi men on ka tawi dhon giggol humindirgol Baabaajo on e Bhiddho on juuraama e men. Annabi Iisaa torike Ben makko yo on hebbinir en giggol makko ngol. Hinaa Baabaajo on tun arata e men, annabi Iisaa kadi no faalaa hodhude kanko tigi ka men. Ko dhun si o fattanii en fii no allankaaku Alla ngun fow heewira e men wano Yuuhanna qirritorii dhun non ka bhatakuru makko dhoo: Alla ko giggol. Kala on wondudho e giggol, haray himo humondiri e Alla, Alla kadi no humondiri e makko.
LANDAL:
- Ko hondhun woni nyoggande tornde nde annabi Iisaa torii nden ko o wadhaynoo golle makko dhen?