Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
2. Fii ko janfotooɗo on sappaa kon e ko o jiɓii kon (Yuuhanna 13:18-32)
YUUHANNA 13:18-19
18 Hinaaa non fii mon on fow mi wi’i ɗun, miɗo andi ɓe mi suɓii ɓen. Kono bee ko windii lon laatoo : On mo mi hawtidi bireedi dartike lan. 19 Ko ɗun waɗi, gila jooni mi yeetoto on ado nden huunde hewtude, fii tuma nde hewtoyi yo on hooloyo ko mi Wonɗo on.
Yudaasi wuuriri no yurmiri, o yiɗaa ɗoftagol maa kurkanagol. O suɓii bonki e laamu e ɗayne. Himo faalanoo ƴettirde Iisaa ka dow rewrude e ƴoyre. No gasa hara himo tanƴininoo karhugol Almasiihu on no on ƴettira laamu ngun. Hari ka tigi tigi ko o gaɲo faalaaɗo muncude Iisaa huutoroowo janfa fii warugol mo. O faamaali ko giggol ngol landii kon. Hari ko o townitiiɗo ka tawi ɗon Iisaa kaɲun ko yankiniiɗo. Hari Yudaasi no wondi e aybinaare e njaggu e bonki, ka tawi ɗon Iisaa kaɲun suɓinoke wontugol jiyaaɗo yankiniiɗo e newiiɗo.
Hari Iisaa no hebulinde taalibaaɓe ɓen fii saa’i ka o janfoytee ɗon fii wota ɓe sikkitoyo fii ko o woni kon Joomiraaɗo hay si o wattoyaama e juuɗe ɓe wonaa Yahuudiyanke ɓen. Ko kanko tigi woni Joomiraaɗo on, seeditiiɗo on law fii saa’i ka o lo’ata ɗon, noddirɗo hoore mun on: «Ko mi Wonɗo on.» Ko nden halfere Alla huutori fii feeɲugol e annabi Muusaa e loyngol yiite e hakkunde pitahun. Himo faalanoo timminde gomɗinal taalibaaɓe ɓen rewrude e sugu ɗin konguɗi holluɗi fii allankaaku makko ngun fii wota ɓe aru e yanude e sikkitaare e ndarndeede.
YUUHANNA 13:20
20 Ka haqiiqa haqiiqa mi andinii on, kala jaɓuɗo mo mi nuloyta on, haray jaɓii lan, awa kadi kala jaɓuɗo lan, haray jaɓii Nuluɗo lan on.
Iisaa njattini taalibaaɓe ɓen e nder kulol fii ko o nangetee e ko o waretee kon. Yamiroore nde o yamiri ɓe nden e ko wondi kon e maɓɓe hiwoyayɓe. Iisaa no imminde taalibaaɓe ɓen o ɗowta ɓe. Hinaa e innde maɓɓe jiyaaɓe makko ɓen yahata, kono ko e innde Joomiraaɗo maɓɓe on. On mo wernii ɓe, haray ko Tatooɓe laaɓuɓe e nder gooto on o werni. On mo gomɗinii konguɗi maɓɓe ɗin, wontay Ɓiɗɗo Alla. Ɗen golle no satti, sabu hiɗe landii okkitirgol hoore mun e yiɗugol ayɓe ɓen e duumagol e nder baasal e weltaare e saa’iiji ɗin fow. Ɗun e wonude, hiɓe andi wondema Alla no tabiti e maɓɓe. Ka ɓe hammiri woo, o ɗowtay ɓe. Ruuhu makko on ardoto ɓe ka o faalaa yo ɓe kurkano mo ɗon no yaadiri e eɓɓooje makko ɗen no golle makko ɗen timmira.
TORAARE: Iisaa-Almasiihu Joomiraaɗo, wallu men no men faamira wondema men waawaa tabitude e maa si men wontanaali ma taho jiyaaɓe. Miɗo faalaa yo a wontanan soono kala misal fii ngurndan an ɗan, no mi wontira yankiniiɗo ka mottodire e jiyaaɗo ka ɓeynguure an. Hita a jaɓu mi jonna Ibuliisa jullere ka ɓernde an. Wallan fii wota mi wonu tun yewtoowo fii kurkanagol, kono yo mi wonu kadi huuwoowo rewrude e doole maa ɗen e faamu maa ngun.
LANDAL:
- Ko honɗun faameten e nder ngal misal Almasiihu on?