Previous Lesson -- Next Lesson
YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn
1. No Daaluyee on woniri e golle makko dhen adii o wontude bhandu (Yuuhanna 1:1-5)
YUUHANNA 1:2-4
2 Tawi himo wondi e Alla ka fuddhoode. 3 Ko rewrude e Daaluyee on Alla tagiri kala huunde, hay huunde e ko tagaa kon alaa ko tagaa e bhaawo makko. 4 Awa kadi ko e makko ngurndan dhan woni, ko dhan ngurndan kadi woni ndaygu yimbhe bhen.
Almasiihu on wuuriraali fii makko, kono ko fii Alla tun. O sertaali e Baabaajo makko on, kono ko e makko tun o fewti, himo wuuri e makko tabiti kadi e makko. Kon ko Almasiihu on fewtiri non tun kon «e Baabaajo makko on» no hittannoo Yuuhanna haa o fillitii dhun laabiiji buy. Ko ko Almasiihu on humii kon soono kala e Baabaajo on woni gundoo Taatoobhe laabhubhe bhen e nder gooto. Hinaa alaabhe tato sertubhe woni gomdhinal amen ngal, hara mo bee no wonti feere, ko Alla gooto men gomdhini, heewudho giggol. Jooni non Joomiraadho on wuuraa kanko tun, kono Bhiddho makko on no wondi e makko soono kala e nder faamodiral timmungal. Si goddho andaali giggol Alla ngol e nder hendagol Ruuhu-Seniidho on, ka haqiiqa o waawataa faamude tigi no Alla woniri. Ko giggol Alla ngol humidiri Baabaajo on e Bhiddho on e Ruuhu-Seniidho on e nder Alla gooto.
Ka fuddhoode fewndo ko Alla tagata aduna on, hinaa kanko tun wonunoo huuwude, o huuwiraali kadi deyyhere, kono ko Daaluyee on o jonniri mo ngurndan dhan. Bhayru ko Almasiihu on wonunoo Daaluyee Alla on, ko e fee makko aduna on tagaa. Dhun no firi wonde Almasiihu on ko Dandoowo e Fattotoodho e Sottoowo e Tagoowo kadi. Bhayru huunde gasataa si o tawaaka, himo jogitii fow. Barki wonanii nden bhernde waawude faamugol mara ko hombo woni Almasiihu on! Piiji dhi gande dhen yiiti dhin fow, piihoy tosokoy koy fow e piiji haylotoodhi dhin ka kammuuli jalba kala, ko mise jaasudhe non yeeso mangural Almasiihu on e bawgal makko ngal. Hawa mon kan, e buso mon ngon e no bhandu mon ndun woniri non e pidandhe bherdhe mon dhen no nandita e bannhe goo wa dokke dhe Almasiihu on wadhani on. Hara hidhon andita weltanooo mo fii dhun?
Piiji dhin fow ko ko tagaa, si wonaa Alla e Daaluyee makko on e Ruuhu makko on. Kanko tigi ko o joom-ngurndan e poomayankeejo e laabhudho. Ko wano Alla jogorani non hoore mun ngurndan dhan, ko wano non kadi Almasiihu on woniri bhundu ngurndan tigi-tigiijan dhan, okkoowo ngurndan dhan on, njattinoowo en mayde nden e happaneede e junuubi, o okkori en ngurndan makko poomayankejan dhan. Dhan ngurndan Alla wondhan e Almasiihu on foolii mayde nden. O yaltii ka yenaade e fee bawgal ngurndan makko iwudhan dhan ka Alla. Almasiihu on ko Tagoowo, ko o bhundu ngurndan dhan kadi. Bhayru non ko o laabhudho, o maayataa hande kadi. Junuubu woo alaa e Alla e Bhiddho makko on, himo wuuri poomaa. Hidhen yiitude miijooji heewudhi fewtudhi ngurndan Almasiihu on e dhee simooje ka Linjiila mo Yuuhanna hewtinani en. Dhan ngurndan no tawaa e tugaale dhin sariyaaji.
Ko ndaygu ngun okkata ngurndan dhan adunaaru ndun fow. Kono fii makko kanko Almasiihu on, hinaa non wonirani mo: ko ngurndan makko dhan woni bhundu ndun sabu ndaygu ngun e heccidhande ko hendotodhen kon e juudhe makko heydhintinanay en tama’u men on. Diina amen kan hinaa diina humiika e sariya mayde e nyaawoore, kono ko nelal ngurndan dhan e ndaygu ngun e tama’u on. Ummutal Almasiihu on hakkunde maybhe bhen bonnitii angal tama’u fow. Ruuhu-Seniidho tabitudho on e men jonnay en feere tawegol e ngurndan Alla dhan.
Junuubu no nibbhitini adunaaru ndun, kono Almasiihu ko mo giggol e nder ndaygu ngun. Nibhe woo nibhe, hunyeendi woo hunyeendi, bone woo bone alaa e makko. Kono dhun si Almasiihu on no fennyinde mangural makko ngal fow. Himo jalbi bhuri ndaygu ngun. E hoore dhun-le, Yuuhanna fuddhoraali hollugol mangural makko tiidhungal ngal, kono o toddhi bawgal makko ngal e ngurndan makko dhan. Ko fii ko andeten laabhal Almasiihu on ngal ko wirtere e nyaawore tun addanta en, sakkitoren muleede. Kono yi’ugol ngurndan makko dhan okkoray en ngurndan dhan. Miijitagol fota fii Almasiihu on tiidhidhay en heydhintina en ko selli.
Ko Iisaa woni ndaygu yimbhe bhen. Hinaa fii makko o woni e jalbirde, o mawnintintaako. Wurin ko nafa men o woni e jalbirde. Hinaa enen woni bhulli ndaygu, kono ko en niwre. Yimbhe bhen fow ko bombhe, kono Almasiihu on jalbinay en no waawiren andirde faamen fii junuubankeyaangal men ngal. E fee Linjiila makko on, en immintinaama hakkunde maybhe bhen, hidhen naatude e nder ngurndan poomayankejan dhan. Almasiihu on no poodhude en, himo noddude en ka ndaygu ngurndan makko no yaltiren e angal tama’uyaagal men ngal. Hidhen bhadorde mo fibhugol anniye e hoolaare.
TORAARE: Joomiraadho Iisaa, medhen sujjude yeeso maa sabu an e Baabaajo on e Ruuhu-Seniidho ko on gooto. A tagirii aduna on e nder nanodiral maa e Baabaajo on. O okkii lan ngurndan dhan. Yaafano lan junuubaaji an dhin, jalbiniraa-mi Ruuhu maa Seniidho on no mi waawira wuurirde no moyyhiri, mi pottoo nibhe dhen mi bhadoo ndaygu ngurndan maa poomayankejan dhan.
LANDAL:
- Ko piiji njeedhidhi hondhi fewtudhi Almasiihu on Yuuhanna holli en ka fuddhoode deftere Linjiila nde o windi nden?