Waters of Life

Biblical Studies in Multiple Languages

Search in "Peul":
Home -- Peul -- Matthew - 072 (Collecting Money for Oneself)
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 2 - Fii waaju e golle Almasiihu on Jaliilu (Matta 5:1 - 18:35)
A - Fii waaju ngun ka hoore fello: Fii sariya teddudho on ka laamu kammu ngun (Matta 5:1 - 7:27) -- Fii no maakuuji Almasiihu on dhin mottindiriraa non ka aranun
3. Fii Polgal ngal e hoore anniyeeji bondhi dhin (Matta 6:19-7:6)

a) On moobhoowo kaalisi fii hoore mun ko Ibuliisa woni e kurkanaade (Matta 6:19-24)


MATTA 6:19-21
19 Wota on moobhu jawle ka hoore leydi, ka dhe bonirta wudhugol e kornugol, e ka wuybhe fusata yhetta. 20 Kono moobhee dhe ka kammu ka dhe wudhataa e ka dhe kornataa e ka wuybhe fusataa yhetta. 21 Ko fii ko ka keyee mon on woni woo, bhernde mon nden wonata.

Aldhubhe goo no moobhira kaalisi miile. Bhe darna cuudhi moolanaadhi, bhe bhornoo conci satta coguuji, bhe bheydira jawle mabbhe dhen laawi dhabbhirdhi kaalisi bhoyliidhi. Bhe huutora kaalisiiji dhin fii bheydugol jawle mabbhe dhen fii no bhe wonira bolondaaji jogiidhi doole kambhe e bheynguure mabbhe, bhe laamoo bheya yimbhe e fee huutorgol doole dhe hebhirta sabu jawdi mabbhe ndin. Wujjoobhe bhen non kanyun kadi dhaanaaki. Bhe reway reweteedhi fow no bhe wujjira kaalisiiji yimbhe aldhubhe bhen, bhe yawitoo bhe, bhe bugitoo golle moyyhe laabhudhe dhen. Bhe suudhoo ndaygu nyalorma ngun, bhe dhayna hoore mabbhe, wano aldhubhe bhen non, bhe dhabbha moyyhere e mawngu e innde e fee wujjugol kaalisi e jawle hittudhe dhen. Bhe maayay ko bhooyaa wano heddiibhe bhen non, bhe ronka luttude nafitorde jawle mabbhe dhen.

Hidhen haani wonude jogiibhe faamu, anden wondema huunde wootere wondude nden e polgal ko moobhugol keyeeji ka kammu. Hitteendi majji on bontataa, kornu e fuunu bonnataa dhe, doole e bonki ittantaa en nafa majje on. Wuybhe bhen wawataa bonnude hay huunde maa bhe wujja. En yiitay weltaare heyre, ndondi ndi bontataa e ndi feyyhataa.

Ko ka keyee men on woni woo, si ko ka leydi maa ka kammu, ko dhon bhernde men nden wonata. Bee wonen feewubhe e faamubhe e nder ko subhotodhen kon keyee men on, bhayru no ruuhu men on fewndori non, e maana ko nde wadhori kon, ko battane bhandu ndun maa ruuhu on, aduna on maa kammu ngun. Bhernde nden e keyee on no jokkondiri, wano busool tindinirta non funnaange maa no piindi wi’eteendi ndin turnesol jokkirta non naange ngen. Ko ka keyee maa on woni woo, ko dhon jawdi ndin e hitteendi ndin, giggol ngol e yidheede nden, ko hella dhon faaleeji dhin e dhabbhere nden hammirta. Joomi on lontiniranay on keyee mon on mbuunyaari si hawrii on marii anniyeeji mon dhin e miijooji mon dhin ka dhi fewtidhon e makko. Wano non, on wontoyay rindhubhe rindhani jawle yi’otoodhe dhen e adunayankooje dhen, hendoyodhon keyeeji kammuyankeeji dhin.

Miskimbhe bhen bhuraa aldhubhe bhen, bhayru hibhe faalaa kambhe kadi hebhude ko aldhubhe bhen jogii kon. Bhe dhidhoo kala non hibhe darnande hoore mabbhe fii ko aroyta kon tippude e keyeeji adunayankooji. Ko karahan bhe faamirta wonde wonkii mabbhe kin ko poomayankewi, awa hibhe hatonjini e nyaametee ruuhuyankeejo. Alaa ko maraa lannoode si wonaa Alla. Yaafuyee Almasiihu on yedhay neweede bhurde keldhude fii ngurndan mon dhan bhuri suudu darniraandu no tiidhiri waawayndu lancaade nde bombu bugaa maa ndu waylitoo nde leydi ndin dimmbii. Gomdhinal men ngal no hitti bhuri dipuloomuuji men dhin. Giggol mon ngol sabu Ruuhu Seniidho on no hitti bhuri kaalisiiji dhi jogidhon dhin ka banki. Ko wallitotodhon maapiibhe bhen kon mawninay Alla. Dokke mon dhen bheydataa keyee mon wondho on ka kammu, bhayru ko Alla woni jawdi mon ndin e ko kanko woni keyee bhurdho mawnude on.

Jamaanu men ngun wontii miilante. Yimbhe bhen no yaarude yeeso fota ka bannhe bhantal keyeeji e piiji kesi. Yimbhe bhtérialiste. Hibhe dhabbha ngurndan moyyhan, bhe yejjita Alla seniidho e sariya makko on. Ruuhu-Seniidho on hari wondaa e mabbhe, hibhe heewi ruuhu bondho mo aduna on. On mo dhabbhii nafaaji wondhi dhin ka aduna ko maccudho ruuhu nibhe dhen. Allaahu on tagii en e nando makko. Fewten mo. Onsay mangu makko ngun feenyoyay ko laabhani gite men dhen. Kono si on huccinii gite mon dhen Joomi on e si on jokkii yidhere kaalisi e jiibholdu, gite mon dhen wontoyay yurmudhe e nibbhitudhe.

Bone hinaa e kaalisi e alhaali tun humii, kono kadi ko e ruuhu wondho e liddaade Allaahu on. Almasiihu on ko noddiri «Mammon» ko bhoyliidho, nden innde no firi jawdi. Ko kanko woni ardaade bhen bhe wonaali sellubhe finde e fee Alla. Ka haqiiqa, aldhudho on no mari feereeji heewudhi no o huntira faaleeji makko dhin e nder aduna on. Jawdi ndin no waawi tindinde kuudhe hunnyudhe maa huuwooje jinaa. Aldhubhe bhen no ndarndireede piiji bhoyliidhi e kuudhe wondudhe e sikkitaare. Allaahu on no hiwude en e fee hadhugol en yi’ugol kuudhe e lette ko yimbhe bhen huuwata kon fow e jemma gooto ka nder ca’e men e fee huutorgol jawle mabbhe. Si wonaano dhun hakkile men dhen bonayno. Kanko Allaahu on non himo munnyii e himo waawi ronditaade hay yimbhe jiibhiibhe bhen.

Si tawii ko nduu sanamuru wi’eteendu jawdi maa Mammon woni ko laamii en, Joomi on wakkilinay en no artiren ka makko. Himo faalaa tambitaade on o jattina on bhayru on gasataa rewude Alla rewon jawdi nde wootere. Julde mon nden wontay meerenteere si tawii ko e kaalisi fawudhon hoolaare mon nden. Hidhon haani subhaade hakkunde hoolorgol Alla e hoolorgol jawdi. Ndartee bhernde mon nden, eton saa’aaji dhin e kaalisiiji ko huutorton kon fii kurkanagol Alla e ko maranton kon hoore mon onon tigi (fii otowal mon ngal e fijidaaruuji dhin). En fow hidhen ndarndaa wontugol maccubhe jawdi maa Mammon. Hidhen dhayna hoore men, rewa nduu sanamuuru wi’eteendu jawdi maa Mammon nde hidhen moobha jawle dhen. Allaahu on no faalaa jattinde en doole kaalisi, o adda en no tabitiren e Almasiihu on e kisiyee makko on. Bhurdho senaade on non ko keyee mo sugu mun alaa ka nder ngurndan, awa hita en jokka dhabbhugol innde hakkunde jamaa on. Dhabbhee no rewiron Joomi on, miijodhon fii miskimbhe bhen, okkitiron hoore mon fii bheya yimbhe wano Almasiihu on sakkorii non hoore mun fii mon.

Gomdhinbhe goo no dhabbha no bhe rewira Alla bhe rewa jawdi. Bhe faamaali wondema Almasiihu on maakii wonde gooto waawataa gollande jeybhe dhun dhidho nde wootere. Wano non, toree Joomi on mangu no o wallira on no yidhiron mo, no o hiwira on e no o yedhira on ko hatonjindhon e mun kon fow. Hara hidhon jabha rewude Alla tun? Kaa haa-jooni hidhon wadhi e dhidhi hakkunde dhin dhidhi? Noddee Almasiihu on, on mo anditantaa bhen bhe bherdhe mun dhen senditii.

MATTA 6:22-23
22 Ko yiitere woni ndaygu bhandu. Si tawii yiitere nden no selli, haray bhandu ndun fow no ndaygi. 23 On mo yiitere mun nyawi, haray bhandu ontigi ndun fow no e nder niwre. Si tawii non ngun ndaygu wongu e ontigi ko niwre, haray ko embere honto nden niwre mawni!

Ko yiitere woni ndaygu bhandu, lampu on ko ndaygu ngun maandini. Ko yiitere nden non woni ndaygu ngu neddho yiirata kala huunde. Yiitere nden ko tintorgal ka waaweten sendindirde sommbooji dhin e miijooji dhin e etirdhe ko neddho huutorta kon. Si tawii hibhe yidhi en, en yi’ay giggol ngol ka gite mabbhe. Si hibhe anyi en, en anday ngayngu mabbhe ngun ka gite mabbhe. Si tawii goddho no monii, himo nibbhiti maa himo wondi e metteende, dhun no yi’oo ka gite makko. Si tawii hibhe wondi e ruuhu wondudho e hunnyeendi e gere maa yottande, gite mabbhe dhen kadi yaltintinoyay dhun. Dhayne dhen no jangoo ka gite mabbhe. Mawnintinaare e kowngu no jalba ka gite mabbhe wano nawliigu e haasidaaku, maadhun nyiddeendi e hawjere e ko nanditata e mun.

E ko hondhun non woni firo kaa haala dhoo «si tawii yiitere maa nden no selli»? Yiitere sellunde ko nde Alla tagi nden. Haray neddho on bheyditaali miijooji makko aaliidhi dhin e moneeji makko dhin e yhoyreeji makko dhin e faaleeji makko dhin e mawnintinaare makko nden. Si dhin piiji fow no woodi, haray hinaa yiitere sellunde woni ton.

Yhetten kadi misal goo: gite maamiraabhe men arambhe bhen, Aadama e Hawaa hari ko laabhudhe ka fuddhoode. Tawi leggal andinayngal ko moyyhi e ko boni no darii ka hakkunde tutateeri (Fuddhoode 3:3). Bhe rewuno takko maggal nyannde woo hara bone woo wadhaali, kono fewndo ko ndarndande mboddi ndin meemi gite mabbhe dhen, e fee fodugol bhe wonde «on wa’ay wa Alla, andon ko moyyhi e ko boni» (Fuddhoode 3:5), tawi han kadi gite mabbhe dhen laabhaa. Wano non bhay «debbo on ndaari tawi bhibbhe ngal leggal no moyyhi fii nyaamugol, no foti fii ndardhe, awa kadi no moyyhi fii okkugol hakkil» (Fuddhoode 3:6), fow waylino, bhayru gite mabbhe dhen seedii e laabhal mabbhe ngal. wano gite dhe bhe fewtinnoo dhen leggal ngal waylorii non, ko wano non gite dhe bhe fewtinnoo dhen e mo bee e mabbhe waylornoo kanje kadi.

Awa si tawii gite mon dhen ko newiidhe, hara dhe wondaa e batte faale e ndarndande maa miijooji wirniidhi, bhandu mon ndun fow jalbay. Kono si goddhun tuuninii yiitere mon nden, wano yawitaare maa yottande, batte mon dhen wayloto, piddandhe bhernde nden bheydoo. Miijooji mon dhin accay batte ka bhandu mon, bhandu mon ndun nanditay e niwre.

Tuubee kisan nde arudhon e monaade, nde jimminaare nangi on maadhun faaminkinodhon hidhon weltii! Artee ka annabi Iisaa. Ko kanko woni ndaygu haqiiqawu, ardiidho on on e gite dhe yi’irton dhen.

MATTA 6:24
24 Hay gooto waawataa gollande jeybhe dhun dhidho, ko si o anyay oya, o yidha oya, maa o habbhoo e oya, o itta bote e oya. Ko dhun wadhi si on waawataa rewude Alla rewon jawdi.

Almasiihu on no fillaade goonga: «Hay gooto waawataa gollande jeybhe dhun dhidho.» Hino sattani goddho rewidugol allaabhe dhidho, bhayru yamirooje mabbhe dhen fottay wonde maa dhe yeddondira wonde goo. Nde jeybhe dhidho jokkondiri, golloowo no waawi jokkude bhe, kono si bhe seedii, ko goddho e mabbhe golloowo on jokkitata. O waawataa jokkitude bhe bhe dhidhoo non, maa o humoda e mabbhe bhe dhidhoo non. O subhoto goddho, o acca oya, ko dhun-noo maa dhun-dhaa anyetee hawkee.

Ndee halfere Mammon lintaade ka yhi’al ko haala arameyen iwi hinde firi «tono - jawdi». E nder oo aduna, kala ko wondani en e nafa no yaadi e Mammon. Kala ko woni e oo aduna, dhun ko mbeleedhe bhandu e himmangol ko yi’i e mantorgol keyeeji dhin, ko ko yaadi e Mammon. Wobbhe ko fijidaaruuji dhin e eltugol bhandu ndun e feyyhingol saa’iiji dhin woni Mammon mabbhe on. Wobbhe goo, ko teddungal e towneede. Mantoore e andital yimbhe bhen ko dhun wonunoo Mammon Fariisiyaabhe bhen. Yidhugol mbeleedhe bhandu e aduna on ko Mammon dhun wi’etee, goddho waawataa rewidude Mammon e Alla ootigi ronka lindodirde, o woopodira e Alla.

Almasiihu on wi’aali on haana, kono ko o wi’i on waawataaa gollande Alla, gollanon Mammon. En waawataa yidhidude bhe maa humoden e mabbhe bhe dhidho. En waawataa jokkude bhe dhoftoo hooloo bhe humoo e mabbhe bhe dhidhoo non bhayru ko liddodirbhe. Allaahu on daali: «Bhiddho an, okkan bhernde maa nden.» Mammon wi’i: «Hinaa non, okkan nde min.» Allaahu on daali: «Yondinor ko marudhaa kon.» Mammon wi’i: «Moobhu fannii hidha waawi moomude e no moomirdhaa woo.» Allaahu on daali: «Hita a janfo, fenaa, wonu nundhudho e feewudho nde hidha gollida e yimbhe bhen.» Mammon wi’i: «Janfo Ben maa tigi, si tawii hidha waawi hettude tono e nder mun.» Allaahu on daali: «Wonu okkoowo.» Mammon wi’i: «Maran fow hoore maa: wurin ngal dokkal wallitotaako hay gooto.» Allaahu on daali: «Hita a ronditoo huunde.» Mammon wi’i: «Rondito piiji dhin fow.» Allaahu on daali: «Teddin nyalaande fowteteende e mun nden no wi’ee alatiire.» Mammon wi’i: «Yhettir nden nyalaande wano dheya nyalaadhe heddiidhe dhen fow non.»

Yamirooje Alla dhen e dhe Mammon dhen hakkee ko yeddodiri en waawataa «gollidande dhe dhidhii non nde wootere. Hita en jillindira Alla e Baalu, kono subhodhen ko hombo faaladhen kurkanaade, humodhen e Alla, hara ko anniye men on huuwirdhen.

TORAARE: Yaa an Baaba, men yettii ma fii ko munyanidhaa men kon, menen bhee miilenteebhe. Yaafano men ko jawdi ndin poodhi men kon e yidhere amen kaalisi nden. Jattin men e ko men fawi kon hoolaare amen nden e hoore jawle amen dhen. Jannaa men no men yidhire e no men fawira hoolaare amen nden e maa an tun. Medhen faala-maa okkude ko men jeyi kon fow e no an hebbiniraa men. Ko an woni keyee amen bajjo on e njoddi amen ndin e nder ngurndan dhan haa poomaa. Wallito men no men okkira maapiibhe bhen e kawtal amen ngal hoore anniye laabhudho.

LANDAL:

  1. Ko hondhun wadhi si en waawataa gollande Alla gollanen Mammon nde wootere?

www.Waters-of-Life.net

Page last modified on May 18, 2012, at 10:02 AM | powered by PmWiki (pmwiki-2.3.3)