Previous Lesson -- Next Lesson
c) Fii no Joomi on tindiniri no juulirtee non (Matta 6:9-13)
MATTA 6:11
11 Okkor men hande nyaametee haanandho men on.
No neddhanke on fewndori non ka kene ko non neweede ruuhu makko on wonirta ka aduna gaa. Battane dhun, sabu ko wonudhen kon faybhe Alla, hidhen haani toraade Ben men ballal e fowtunde ko handudhen e mun kon, dhin piiji ko dokke Alla non.
Hari Almasiihu on alaa e hoynude. O wuuririi wa neddho tigi e nder oo aduna. Bhandu makko ndun no andude heege ngen, o hattonjini e dankata e wattaneede yili e fowtunde. Hino sattani nawnudho e weelaadho e lo’udho yettugol e kurkanagol Allla e nder weltaare. Almasiihu on yawitaaki bhandu neddhanke ndun. O wattii mo juulirde fii Ruuhu-Seniidho on, o yamirii en hiwugol ndu dankoo ndu fii kurkanagol Alla.
Annabi Iisaa jannaali en dhabbhugol no hebbiniren reedu men ndun e no yariren no hebhirdhen feere woo. O ardaaki en yo en lettito maa yo en yondino fii faaminkinagol wondema hidhen labbhinde bhandu men ndun e fee ko uttotodhen nde kon ko yondinotodhen kon nyaama yara. O jannii en fii weltaare wonde nden e nder juulugol e innde Baaba men on: «Okkor men hande nyaametee e ndiyan e conci e golle e fowtunde e warnyakere e kala ko ngundan dhan handi e mun no haanirani men non.» Ndee halfere «bireedi nyaametee» no humindiri kala ko bhandu neddhanke e ruuhu makko on e wonkii makko kin handi e mun kon. Hinaa en daabeeji yondinordhi nyaama yara tun. Hidhen handi e giggol e defte e yaltingol kesun e cellal. Ko dhun wadhi si annabi Iisaa no jannude en yo en toro mo e nder yankinaare e gomdhinal kala ko handudhen e mun fii hiwugol ngurndan men dhan, hara hinaa fii townintinaare maa wuurugol e nder aamere, kono ko fii wuurangol Alla e fii kurkanagol mo.
Toraare Joomi on yaltintinaali haaloowo arano on «min». Annabi Iisaa lontinirii on haaloowo arano e fee huutorgol «menen», ko fii Ruuhu-Seniidho on no jannude en yo en danko bheya e yo en fattano bhe. Allaahu on wonaa Baaba men enen tun, kono ko o Baaba feewubhe bhen fow, hara sendondiral wadhaali. Giggol makko ngol hinaa e men ngol hatti, hingol hundi yimbhe bhen fow. Ruuhu-Seniidho on jattinii en e toraare wondude e ganyaneendi nden fii wota en toro tun fii nyaametee on, kono ko fii ko haanani en kon hannde wondude e barki fii aduna on fow. Himo wakkilinde en yo en sendodu e bheya maral men ngal.
Hinaa neddhanke laamii ngurndan mun dhan. Hinaa kanko jeyi suudu makko ndun e saa’iiji makko dhin e bhandu makko ndun. Ko Alla tagi mo, ko o paykun Ben makko. Ko dhun wadhi si ko kanko jeyi en, wondude e jawle men dhen fow. Ben mon tagii on fii yo on kurkoran mo giggol, himo habbii yo on sendan musibbhe mon bhen dokke mon dhen, woni duhiibhe maa suddiibhe. On waawataa landaade Ben mon yo o wallito on e yo o hisin wonkii mon kin si tawii on alaa e toranaade dhin piiji bheya yimbhe. Gundoo fii hebhugol polgal ngal ko dhabbhugol taho laamu Alla ngun e peewal makko ngal, dhin piiiji fow bheydanoyte en.
Bhayru golle wadhiraadhe dhen sella-findeyaagal ko sarti fii hendagol nyaametee haanandho en on, torodhen Baaba men yo o okku en enen e bheya yimbhe heddiibhe golle laabhudhe.
Baaba men no aldhi ko feyyhiti keerol, kono ko nguddan e yoorere bhernde faybhe makko bhen woni e nenninande en ko hasii kon baraaji makko dhin. Ruuhu-Seniidho on no tindinde en yo en torano weelaabhe bhen e maapiibhe bhen. Toree fii nyaametee mon handeejo on, hita on aana fii ko arata kon jango ko fii Baaba mon dolnudho on e heewa giggoljo on dankoto on.
TORAARE: Yaa an Baaba wondho ka kammu, men yettii ma ittiri bhernde amen nden fow, bhayru a donkiniraali men heege sabu junuubaaji amen dhin. Yaafano men ganyaneendi amen ndin, jannaa men no men kafidira nyaametee amen on e weelaabhe bhen e maapiibhe bhen. Hebbin men giggol maa ngol, kulol hita ande woo aru jiibha men, kono wallito men no men hoolora maa hoolaare timmunde e nder ngurndan amen e mayde amen. Men torike ma yo a yedhu men kaalisi ko yonata fii no men sendintira dheri linjiilaaji dhin e nyaametee ruuhuyankeejo on fii dhuudhubhe. Men yettii ma kadi fii ballal maa ngal e yeesoyaagal maa ngal. Yedhu bhe alaa golle bhen golle laabhudhe no bhe kurkorana maa e nder wakkilaare e tabital.
LANDAL:
- Ko hondhun woni firo nyaametee men mo handudhen on hande?