Previous Lesson -- Next Lesson
a) Fii Malaabhe bhen (Matta 5:1-12)
MATTA 5:1-2
1 Bhay Iisaa yi'ii jamaa on, o yhawi ka fello, o joodhii, taalibaabhe makko bhen kadi bhadii mo. 2 Onsay o woni e jannugol jamaa on, wi'a:
Almasiihu on no yurmaa bhen bhe andaa hoore mun, andaa Joomi mabbhe on. Ko hakkunde majjuubhe bhen o subhii taalibaabhe bhen. O noddi bhe, o ardii bhe haa e fello, o toolii dhon o woni e jannugol bhen bhe o subhii wondude e jamaa wondho takko mabbhe on.
Nawnaaje dhuudhudhe dhe o sellini dhen ka wi’etee dhon Jaliilu fertike laawol ngol fii nden jannde hittude, udditi bherdhe yimbhe bhen fii no bhe hendora jandeeji iwudhi dhin e juudhe heewudho bawgal on e moyyhere e yurmeende immorde Alla. Pellet oo waaju ko yhoggande ko annabi Iisaa waajii kon ka juulirdhe Jaliilu. Dayyhere on waaju ko «Tuubee ko fii laamu kammu ngun bhadike.» Rewrude e on waaju himo faalaa wattitude kuudhe men dhen, kono himo faalaa kadi wattitude ka miijo men ngon fokkiti ton, himo faalaa wattitude kuudhe men dhen, kono himo faalaa kadi wattitude anniyeeji men dhin. Himo tentinani en dhun ka daaluyee Alla: «Artee e an, dhun mi artoyay e mon, ko Joomiraadho Landho koneeli on woni ko daali» (Malakii 3:7).
Almasiihu on no waajaade ka hoore fello Jaliilu. O alaa hay nokkuure ka o waajoo maa «o alaa hay ka o fowtina hoore makko nden». Hara non kambhe jannoobhe fii sariya on bhen e Fariisiyaabhe bhen hibhe newnanaa jannugol fii Sariya Muusaa on wondude e jonde moyyhere e teddungal e maagaraare mun, hara hibhe bhoyla sariya on. Kanko non Iisaa Joomi on e karamokoojo mawdho e goongaajo on ko fello o yondinori ka o waajoo. Hari ngon fello hinaa nokkuure laabhunde wano fello Siyuuna ngon. Almasiihu on no faaminde en rewrude e dhun wondema yimbhe bhen no waawi toraade e hibhe waawi waajaade Linjiila on ka bhe wontiri woo.
Almasiihu on no waajaade e hoore fello fii bhangingol sariya makko on immorde Alla. Ko e hoore fello kadi sariya on ka Ahadi Hindi jonnanoo. Kono wattanee yili fii ko dhin dhidhi seedi kon. Nde Joomiraadho on jonnunoo annabi Muusaa sariya on, on «tippino» ka fello. Jooni non Joomi on kanko himo «yhawude» ka fello. Ka hoore fello Sinaayi, Joomiraadho on yewtirno parnyite e mayhandhe, kono kanko annabi Iisaa ko hawa neeniika o yewtiri e ndee nokkuure wi’eteende Jaliilu. E dhiya saa’iiji neebhunoodhi, jamaa on yamirano yo o wattan yili, o woddhitoo, kono kanko annabi Iisaa himo saatinaa bhadagol, ko waylande wondude e barki nii honno! (Korenti 2 3:7; Yahuudiyankeebhe 12:18).
Hedhotoobhe bhadiibhe bhen annabi Iisaa ko taalibaabhe nootiibhe bhen noddaandu makko ndun (Markuusa 3:13; Luuka 6:13). Himo yewtude bhe bhayru ko giggol bhe jokkiri, hinaa karhaabhe, ka tawata dhon bheya kan ko tanyhiniibhe sellineede e juudhe makko. Himo jannude taalibaabhe makko bhen bhayru hibhe jebbilii hedhagol. Hibhe faalaa faamude maakuuji makko dhin fow. Bhayru hibhe haani jannude bheya heddiibhe, hino hittani bhe ka bhe hebha gandal laabhungal e timmungal fii ko fewti kon fow sariya makko on.
Annabi Iisaa fuddhori waaju makko on ndee halfere «on malii». O fillitike dhun laabiiji jeenay wa hito nanotoongo immorde ka kammu, andingo en wondema ko maloore nden e weltaare nden woni didoodi e gundoo sariya laamateeri makko ndin. En wi’aaka yo on huutor yamirooje dhen e tindinooje mettudhe fii maa yo on rewu e dewe fii no naatiron ka laamateeri Alla. Ko landadhen ko yo en jabhu tun maakuuji Almasiihu on rewrude e gomdhinal ngal. Onsay on hisinte nyaawoore Alla nden e lette dhe lannataa dhen. Almasiihu on no saatinde on ka weltaare bhayru o ariraali fii mulugol junuubankeebhe bhen, kono ko fii dandugol bhe. Ko Alla feenyani kon yimbhe bhen ko tippude e weltaare bhooyayde e anditugol moyyhere nde wadhana dhen nden, kono hinaa e yamirooje dhen e himbugol gondhi.
LANDAL:
- Ko fii hondhun yamiroore Almasiihu on nden fuddhori ndee halfere «maloore» dhoo yo nde fuddhor «hidhon haani» maa «on haanaa»?