Waters of Life

Biblical Studies in Multiple Languages

Search in "Peul":
Home -- Peul -- Matthew - 024 (Herod’s Attempt to Kill Jesus)
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 1 - Piiji arani dhin ka golle Almasiihu on (Matta 1:1 - 4:25)
A - Fii jibineede annabi Iisaa e paykunyaagal makko ngal (Matta 1:1-2:23)

4. Fii no Heroodu etorii warugol annabi Iisaa non (Matta 2:12-23)


MATTA 2:12-15
12 Onsay Allaahu on andini ɓe e koyɗol wonde hita ɓe yiltito ka Heroodu. Ɓe rewti laawol goo, ɓe hooti ka leydi maɓɓe. 13 Ɓay wonii ɓen gandiɗuɓe yahii, malaa'ikaajo Joomiraaɗo on feeɲani Yuusufu e koyɗol, o wi'i mo: «Immo, ƴettaa paykun kun e yumma mun, dogaa yahaa *Misira, wonaa ton haa nde mi wi'i yo a artu woo. Ko fii Heroodu ɗaɓɓitoyay paykun kun fii warugol kun. 14 Yuusufu immii jemma, ƴetti paykun kun e yumma mun, yahi Misira. 15 O woni ton haa Heroodu maayi. Ko nii ko Joomiraaɗo on daalirnoo annabaajo on kon laatori, wonde: «Mi noddii Ɓiɗɗo an on yo o yaltu Misira.

Alla bonniti ebbhoore bonde Heroodu nden on hoolornoodho gandidhubhe bhen fii yiitugol nokkuure ka boobo on jibintee dhon. Ibuliisa no ebbhi warugol Almasiihu on e jokkoobhe bhen Almasiihu on. Kono Alla hiway subhaadho on haa on timmina golle makko dhen ka hoore leggal altindiraangal. Gooto waawataa wurtude maa neebhinde muydhe Alla dhen fii kisiyee mo o ebbhi on sabu o danday nelaabhe makko bhen. Alla waajii gandidhubhe bhen e koydhol wondema hita bhe yiltito ka Heroodu. Bhay bhe anditii ko Joomiraadho on huuwiri kon sookewo mun ngon e telenma mabbhe, bhe rewti laawol goo, bhe hooti. Bhe humondiri e Almasiihu on ka bannhe ruuhu sabu gomdhinal ngal ko humondirbhe e kammu ngun, dhun hari ko woowani bhe non.

Yuusufu hebhaali no o deyyhinora. Ko gandidhubhe bhen ari kon fii yhewtagol bhe e dokkal ngal bhe addannoo bhe ngal jibhi mo. Ado yo o dhaano, o torii Joomiraadho on yo o fennyinan mo faale makko on. E nder jemma on, rewrude e malaa’ikaajo makko darjindho on, Bhurdho-Toowude on hajii mo fii bone sutiidho on boobo on e bheynguure makko nden fow, bhayru Heroodu no faalaa warude paykun kun. Alla no humpitii ko hunnyudho on ebbhi kon, o tindini Yuusufu dogirgol Misira.

Yuusufu dhoftii kadi Joomi makko on. Wano Yuusufu non, hidhen haani dhoftorde Alla gomdhinal edii yo en dhofto yimbhe bhen e mojobhe dhe bhe sinci dhen. Ko koydhol ngol lanni, tumbere jemma, o immii, o findini sonnaajo makko. Bhe yhetti bhiddho on, bhe dogiri ka wi’etee dhon Hebruuna. Bhe iwi dhon, bhe lumbi wulaa on haa bhe hewtoyi Misira. Windoowo Linjiila on woowlanaali en hay huunde fii satteendeeji e boneeji dhi bhe fottunoo dhin ka hoore laawol. En anda si tawii bhe nabhorno goddhun, maa si tawii hibhe joginoo keyeeji, maa si tawii koydhe bhe yaari, maa si ko mbabba bhe wadhinoo. Ko ko tindinooje Alla dhen woni kon feewudhe soono kala o holli en. Dhe laatoray seedha seedha hara huunde lindaaki dhe.

Aaya 14 on wi’i: «Yuusufu immii jemma, yhetti paykun kun e yumma mun, yahi Misira.» Ko paykun kun fuddhoraa linteede kon no nandita wa si ko kankun bhuri hittude, kanko Mariyama o noddiraaka «bheyngu Yuusufu», kono «yumma paykun kun» o noddiraa, dhun no jonni mo teddungal. Ko feyyhunoo ko neebhi, Yuusufu karhano, o dogiri Misira fii hebhugol ka o suudhoo sabu ko musibbhe makko bhen tampinaynoo mo kon. Bheynguure nden hewti non Misira, ka sanamunkeebhe bhen, ka woddhitii fota juulirde mawnde Joomiraadho on nden. Hay si tawii hibhe woddhitii juulirde mawnde Joomiraadho on, Joomiraadho on no wondi e mabbhe, on faalaadho yurmeende nden, hara hinaa sadaka» (Husaa’a 6:6). Faybhe Alla bhen no waawi hodhude e saa’iiji goo e nokkeeli ka tawata bhe waawataa nabhidude e musibbhe mabbhe worbhe e rewbhe Almasiiyaabhe bhen, hara yimbhe bhurbhe dhuudhude bhen e dhin nokkeeli hinaa andubhe Joomi on e hara kadi ko bhe yimbhe bonbhe. Hodhidugol e bhen bonbhe hinaa junuubu non. Ko woni junuubu ko jokkugol ko yimbhe bhen rewata kon bhaawo Alla.

Yi’ugol Bhiddho Alla on leydi Misira hinaa ko metti faamude non, dhun ko ndii leydi hawniindi e nduu suudu njaggu. Allaahu on yaltinoyay bhe ton. Bheynguure nden suudhii Misira ton, kono Alla yejjitaali nde. Bhe Alla subhii bhen fow ka aranun no nandita e bhe tikkere nden hawrani. Ko leydi Misira bhe jibinaa ka telenma ruuhu on. E nyalaande nde bhe ruttii nden, ko nden nyannde bhe noddaa yaltugol Misira fii no bhe hendora nafa hettaare nden.

Ko Allaahu on ebbhani kon boobo jibinaadho on no feenyi e kannhe dhe gandidhubhe bhen yedhi dhen. Ko non Alla subhori okkorgol bhe ko bhe haani yobhude kon fii coggu yaadu mabbhe ndun. Joomi on dankoto soono kala faybhe makko bhen, o yedha bhe ko bhe hattonjini kon e saa’i hawrudho on.

Annabi Iisaa e bheynguure mun nden lutti Misira haa e hitaande 4 adii I.-A. ko e nden hitaande Heroodu maayi. Kon ko tentinaa fii mun dhon ka taariika no holli kadi wondema ko ado nyalaande nde o wi’eteedho Denuusi jannoowo e dudhal ka jangoobhe bhen weeri jonni nden annabi Iisaa jibinaade. Hande hidhen andi wondema Almasiihu ko duubhi 7 haa 8 adii nyalaande wadhaande nden ka fillande jibinaa.

Ko wano Allaahu on noddiri non jurriya Yaaquuba on yo bhe yaltu Misira, ko non kadi o noddiri Bhiddho makko yo on yaltu Misira, o hoota ka leydi makko. Ko dhon annabi Iisaa fuddhaa noddireede «Bhiddho an on», maadhun Bhiddho Allaahu on. Nden seeditoore no holli cuucal oo windudho on ndee deftere ka Linjiila, ko fii Yahuudiyankeebhe bhen no yhettirnoo nden innde ma tiwugol Alla, sabu dhun bhe fidhay ootigi kaayhe. Ko Almasiihu on woni kon Bhiddho Alla hinaa mawnintinaare e njaggu firi. Anditee wonde gila ka fuddhoode ko aaden wondho e dhabbhude faabo e hawkaadho e mo cukkaadho rewrude e bawdhe wondhe dhen ka aduna.

Ko o woni paykun, o jannaama wonde urngallo ngon (ko mangu ngun maandinaa) dhun no yaadi e mirri ndin (dhun ko tampere nden). Kono non, Ben makko wondho on ka Kammu no dankii mo. Ko kannhe dhen wallitii mo no o wuurira Misira ka leydi jananiri.

TORAARE: Midho sujjande yaa an Baaba bhayru lambhe bhen e hooreebhe leydhe dhen gaynaata few dartagol ma. Hidha andi gundooji wondhi ka bherdhe yimbhe bhen. Tefan, andaa fii lan, sellinaa lan fii wota mi wontu ganyo Bhiddho maa on, kono ko yo mi hoolo mo. Yaa an Joomiraadho, aynan tuma cukkeede nden e bugiteede nden e ngayngu ngun yani e an sabu giggol ngol mi yidhiri ngol Bhiddho maa yidhaadho on.

LANDAL:

  1. Ko honno Alla hisiniri Iisaa ko o woni paykun kanko e mawbhe makko bhen e juudhe Heroodu?

www.Waters-of-Life.net

Page last modified on May 18, 2012, at 09:04 AM | powered by PmWiki (pmwiki-2.3.3)